تقول خير...ناصر الفراعنه

تقول خير منين بالله يجي خير
وانا معك قضيت عمري بلاشي

اصبحت مثل اللي مراده لبن طير
وانا مرادي بوسة وانت ماشي

عنك ارفع الكفين حشمة وتقدير
شيمة حرار ما ترب العشاشي

ولا فانا المجنون حكمة وتدبير
وقبلك جلابيب الرعابيب شاشي

لو ودي افعل ما فعل سالم الزير
والله لاخيط من جديلك فراشي

لا شك ابيها منك فزعة مناعير
ووصل الاحبة ما يجي بالهواشي

فكان المراد انساك ياصاحبي طير
والله لاموت وعلتك وسط جاشي

كل شي الا نسيتك يمكن يصير
لو جابت الناقة ثلاثين حاشي

لولا دموعي فيك ما ترجع البير
وللغيث ما ينشي على نجد ناشي

بالله كيف انسى هذيك النواوير
وسود العيون المسكرات الغواشي

ولا ثنين قطعن الازارير
ومن الحرير يصيبهن ارتعاشي

ولا ثنين مثل بيض القوارير
شفت ازرق الما بينهن يوم طاشي

ولا ثنين يفضحن الحمارير
حمر الطعوس اليا صبغها الرشاشي

ادخل على الله مانت مضبوط يصغير
ولا فكيف انساك وانته معاشي

وان لمتني يا وش بقى عاد للغير
الغير واجد والملامة بلاشي
_________________